Powered By Blogger

Saturday, May 23, 2015

ഒരു പഴയ/പുതിയ അനുഭവം

ഒരു പഴയ/പുതിയ അനുഭവം

ഞായറാഴ്ച കാലത്തെ ആരാധനക്ക് ശേഷം കാല്‍നടയായി മാരാമണ്‍ റിട്രീറ്റ്‌ സെന്‍ററിലേക്ക് പോകുകയായിരുന്നു ഞാന്‍...............
കുറെ നാളുകള്‍ക്കുശേഷമാണ് ളോഹ ധരിച്ച് ഇത്രയും ദൂരം നടക്കുന്നത്.....

കോഴഞ്ചേരി പാലത്തില്‍ നിന്ന് മാരാമണ്‍ കണ്‍വന്‍ഷന്‍ പന്തല്‍ നോക്കിക്കാണുന്നത് എനിക്കിഷ്ടമുള്ള ഒരു കാര്യമാണ്.................പാലത്തില്‍ നിന്ന് മാരാമണ്‍ കണ്‍വന്‍ഷന്‍ പന്തലും പരിസരവും കാണുവാന്‍ നല്ല ചന്തം..............മനസ്സിന് ഇമ്പം നല്‍കുന്ന ആ കാഴ്ച പ്രകാശചിത്രത്തിലാക്കുവാന്‍ എന്‍റെ ചിത്രം പിടിക്കുന്ന ഉപകരണം ഞാന്‍ തയ്യാര്‍ ചെയ്യുന്നതിനിടയില്‍ എനിക്കപ്പുറത്തുനിന്നായി പ്രകാശചിത്രം പിടിക്കുന്ന ഒരു സ്ത്രീ എന്‍റെ ശ്രദ്ധയില്‍പ്പെട്ടു..................എന്നെപ്പോലെ ആ സ്ത്രീയും കാഴ്ചയെ ഓര്‍മ്മയാക്കുവാനുള്ള തത്രപ്പാടിലാണ്............

പ്രകാശചിത്രം പിടിച്ച ഞാന്‍ എന്‍റെ നടത്തം തുടര്‍ന്നു.........
നടത്തത്തിനിടയില്‍ കേട്ട ഒരു ആക്രോശം എന്നെ വല്ലാതെ വേദനിപ്പിച്ചു............

അതൊരു അപഹസിക്കലാണോ, അപമാനിക്കലാണോ, നിന്ദിക്കലാണോ, മുറിവേല്‍പ്പിക്കലാണോ എന്നെനിക്കറിയില്ല........ഇവകളുടെ എല്ലാം ആകെത്തുകയാണ് ഇതെന്ന് കരുതുന്നതിലും തെറ്റില്ല..............

മുച്ചക്രവാഹനത്തില്‍ സഞ്ചരിച്ച ചില ചെറുപ്പക്കാര്‍ ആ സ്ത്രീയുടെ നേരെയാണ് ആക്രോശിക്കുന്നത്..............

അവരുടെ വാക്കുകളെല്ലാം ഇവിടെക്കുറിക്കാന്‍ എനിക്ക് ബുദ്ധിമുട്ടുണ്ട്.......എങ്കിലും ഒരു വാചകം കുറിക്കട്ടെ.....(അത് പുരുഷമേധാവിത്വത്തിന്‍റെ പുളിച്ചുതികട്ടല്‍ തന്നെയാണ്......)എന്തോന്നാടീ....ഒരുമ്പെട്ടവളേ.......നിനക്കൊന്നും വീട്ടില്‍ വേറെ പണിയൊന്നുമില്ലേടീ.............!!!!!!!!!!!!!!!!!!!

ഈ ആക്രോശം ദൈവനിന്ദയായി എനിക്കുതോന്നി.......ഒരു ജനതയ്ക്കാകെ അപമാനവും........

ആക്ഷേപശരത്തെ അര്‍ഹിക്കുന്ന പുച്ഛത്തോടെ തള്ളിയ, ആ നിന്ദയുടെ മുന്‍പില്‍ പതറാതെ നിന്ന ആ സ്ത്രീയുടെ ആളത്വബോധത്തെ ഞാന്‍ ബഹുമാനിക്കുന്നു.........................അവള്‍ സമയമെടുത്ത് പ്രകാശചിത്രം തന്‍റെ സ്വന്തമാക്കി ഉറച്ചകാല്‍വെയ്പ്പോടെ നടന്നകന്നു.........

പക്ഷേ എന്നെ ചിന്തിപ്പിച്ചത്..... പുരുഷ മേധാവിത്വം വരച്ച ചില ലക്ഷ്മണ രേഖക്കപ്പുറത്തേക്ക് സ്ത്രീ കടന്നുചെന്നാല്‍/ചില നിയതഘടനകള്‍ക്കപ്പുറത്തേക്ക് ദൈവവും ഈ രാജ്യത്തിന്‍റെ ഭരണഘടനയും നല്‍കുന്ന സ്വാതന്ത്ര്യത്തോടെ കടന്നുപോയാല്‍ അവള്‍ ഒരുമ്പെട്ടവളായി...........

സ്ത്രീയുടെ സ്വാതന്ത്ര്യത്തെ ചങ്ങലക്കിടാന്‍ ആരാണ് ചിലര്‍ക്ക് അധികാരം നല്‍കിയത്.......സ്ത്രീത്വത്തെ എങ്ങിനെയും ആര്‍ക്കും അധിക്ഷേപിക്കാമോ?
ക്രിസ്തുനല്‍കിയ സ്വാതന്ത്ര്യത്തെക്കുറിച്ച് സ്ത്രീ സംസാരിച്ചാല്‍പ്പോലും അവള്‍ ധിക്കാരിയായി..........

ദൈവസന്നിധിയില്‍പ്പോലും സ്ത്രീയുടെ സ്വാതന്ത്ര്യം നിഷേധിക്കുന്നവരേ......നിങ്ങള്‍ക്ക് ഹാ കഷ്ടം...........

സ്ത്രീത്വത്തെ അപമാനിക്കുന്നവരേ, കളിയാക്കുന്നവരേ.....അവരുടെ ചലനങ്ങള്‍ക്കും, ചിന്തകള്‍ക്കും, ഭാഷക്കും, അക്ഷരത്തിനും കൂച്ചുവിലങ്ങിടുന്നവരേ....നിങ്ങള്‍ ക്രിസ്തുവിങ്കലേക്ക് മടങ്ങുവിന്‍..........സത്യം നിങ്ങളെ സ്വതന്ത്രരാക്കും.....

ക്രിസ്തുവിന്‍റെ സന്നിധിയില്‍ കുഞ്ഞുങ്ങളും, സ്ത്രീകളും, പുരുഷന്മാരും തുടങ്ങി ഈ സമൂഹം തള്ളിയവരും, പുച്ഛിച്ചവരമെല്ലാം ഇരിക്കുന്നു....ക്രിസ്തു അവരോടൊപ്പം അത്താഴം കഴിക്കുന്നു...........

ചരിത്രത്തില്‍ സ്ത്രീകളിലൂടെയും ഇടപെട്ട/ഇടപെടുന്ന ദൈവമേ........ഈ ലോകത്തിന് തിരിച്ചറിവ് നല്‍കുക.........ഞങ്ങള്‍ക്ക് പുത്തന്‍കാഴ്ചയും, ഭാഷയും ദര്‍ശനവും നല്‍കുക.............

ഞങ്ങളുടെ മലീമസമാക്കപ്പെട്ട, ഇടുങ്ങിയ, അധീശത്വ മനസ്സുകളെയും ഭാഷയെയും അവിടുന്ന് അവിടുത്തെ ആത്മാവിനെ അയച്ച് രൂപാന്തരപ്പെടുത്തുക........



Thursday, May 14, 2015

ഉണങ്ങിയ അസ്ഥികള്‍ ജീവിക്കുമോ?


അക്ഷരബോധമില്ലാത്ത, വായനയില്ലാത്ത, ചരിത്രബോധമില്ലാത്ത, രാഷ്ട്രബോധമില്ലാത്ത, നീതിബോധമില്ലാത്ത, മുന്‍വിധിയുള്ള, ചര്‍ച്ചകള്‍ക്ക് ഇടം നല്‍കാത്ത, വിമര്‍ശനങ്ങളില്‍ അസഹിഷ്ണുത കാണിക്കുന്ന, സമ്പന്നന്‍റെ പക്ഷംമാത്രം പിടിക്കുന്ന, ഒരിക്കല്‍പ്പോലും കീഴാളബോധ്യങ്ങളില്‍നിന്നുകൊണ്ട് തീരുമാനങ്ങള്‍ കൈക്കൊള്ളാത്ത, ഉദ്യോഗവൃന്ദവും, ഭരണവര്‍ഗവും, മതനേതൃത്വവും..........................അവര്‍ക്ക് കീ ജയ് വിളിക്കുന്ന കുറെ അന്യഗ്രഹ ജീവികളും...!!!!!!!!!!!

കേവലകക്ഷിരാഷ്ട്രീയത്തിലും, ജാതി-മതബോധത്തിലും, പണക്കൊഴുപ്പിലും, കിങ്കരന്മാരുടെ ഉപദേശത്തിലും മാത്രം ഒരു ബഹുസ്വരജനതതിയുടെ( മതത്തിലും, രാഷ്ട്രീയത്തിലും)  തീരുമാനങ്ങളെടുക്കുന്നവര്‍ ഈ ചരിത്രത്തോടും, ജനതയോടും ചെയ്യുന്ന ക്രൂരതയുടെ ആഴം എത്രപേര്‍ തിരിച്ചറിയുന്നു?

അധികാരികളുടെ കാല്‍തിരുമ്മി, ഓച്ചാനിച്ചുനിന്ന്, പരദൂഷണത്തിലൂടെ പാരപണിഞ്ഞ്, പഞ്ചപുച്ഛമടക്കി എല്ലാ സത്യങ്ങളേയും തമസ്കരിച്ച് അധികാരകേന്ദ്രങ്ങളിലെ വാര്‍ത്തകള്‍ചോര്‍ത്തി (ഇന്ന്) ജീവിക്കുന്ന പരാന്നങ്ങള്‍ നാളെ രാജ്യത്തേയും, മതങ്ങളേയും ഭരിക്കുന്ന/നയിക്കുന്ന കാഴ്ച എത്രയോ ഭീകരം........ഇന്നും അതാണ് സംഭവിക്കുന്നതെന്ന് എന്‍റെ വലതുവശത്തിരിക്കുന്ന റേഡിയോ ഏതോ ഭാഷയില്‍ പറയുന്നു!!!!!!!!!!!!!!

മാധ്യമങ്ങളെ വിലക്കുവാങ്ങി/ അവര്‍ക്ക് അടിമകളായി സ്വന്തം ഇമേജ് വര്‍ദ്ധിപ്പിക്കുവാന്‍ മാത്രം ശ്രമിക്കുന്ന........................വൈകാരികപ്രസംഗത്തിലൂടെ മാന്ത്രികവിഭൂതിയിലേക്ക് ജനങ്ങളെ നയിച്ച്‌, സുന്ദരമായ ഫോട്ടോ എല്ലായിടത്തും കുത്തിനിറച്ച് ഒരുങ്ങിച്ചമഞ്ഞ് നടക്കുന്നവര്‍ക്കെങ്ങിനെ ദളിതരുടെ, ദരിദ്രരുടെ, കര്‍ഷകരുടെ, പാതയോരത്ത് കിടന്നുറങ്ങുന്നവരുടെ കഥകള്‍ പറയുവാനാവും...................അവരെ സംബന്ധിച്ചിടത്തോളം മേല്‍പ്പറഞ്ഞവരാരും മനുഷ്യരല്ലല്ലോ............ശല്യങ്ങളായ തെരുവ്‌മൃഗങ്ങളാണല്ലോ( ഞാന്‍ പറയുന്നതല്ല......അവര്‍ പറഞ്ഞുകഴിഞ്ഞു....ഒരൊറ്റ ആത്മീയ കോമരങ്ങളും പ്രതികരിച്ചുകണ്ടില്ല !!!!!!!!!!!)

ഇന്നിന്‍റെ രാഷ്ട്രീയപ്രത്യയശാസ്ത്രവും, ദൈവശാസ്ത്രവും നിര്‍മ്മിക്കുന്നത് ഇന്നിന്‍റെ ഫറോകളും, ബാലിന്‍റെ പ്രവാചകന്മാരും കൈകോര്‍ത്ത്‌പിടിച്ചുകൊണ്ടാണല്ലോ................അതുകൊണ്ടുതന്നെയാണല്ലോ ഇവിടെ ആരെല്ലാം കൊല്ലപ്പെട്ടാലും, തകര്‍ക്കപ്പെട്ടാലും, ചൂഷണം ചെയ്യപ്പെട്ടാലും മതവും രാഷ്ട്രീയവും ഇവിടെ കള്ളനും പോലീസും കളിക്കുന്നത്....!!!!!!!!!!!!!!!!

അക്ഷരങ്ങളെ ഭയക്കുന്ന, ആശയങ്ങളെ വെടിവയ്ക്കുന്ന, തൂക്കിലേറ്റുന്ന, കല്‍ത്തുറുങ്കിലടയ്ക്കുന്ന, കാപാലികരും, ഭരണകൂടവും തമ്മില്‍ എന്ത് അന്തരം...............?

ദൈവമേ.............ഭൂമിയില്‍ ജീവന്‍ നിര്‍ദയം കുരിശേറ്റപ്പെടുന്നു..............എല്ലാവരും ഓടി ഒളിക്കുന്നു..............

ക്രിസ്തുവേ......നാഥാ...............ഉയിര്‍പ്പിന്‍റെ സംഗീതം പെരുമ്പറയായി ഇവിടെ മുഴക്കൂ............ഉണങ്ങിയ അസ്ഥികള്‍ ജീവിക്കട്ടെ......................മരണത്തിന്‍റെ കിങ്കരന്മാര്‍ ലജ്ജിതരാവട്ടെ...............

ക്രിസ്തുവേ....നീയാണെന്‍റെ പ്രതീക്ഷയും, പ്രത്യാശയും