ദേവാലയം...........
ദൈവമേ ഞങ്ങളെ
അവിടുത്തെ ആലയമാക്കുക........
കപടതയുടെ മുഖംമൂടികളെ
പരസ്യമായി ഞങ്ങളില്നിന്നും വലിച്ചു കീറി ഞങ്ങളുടെ യഥാര്ത്ഥമുഖത്തെ ലോകത്തിനുമുന്പില്
പ്രദര്ശിപ്പിക്കേണമേ.......
ആരാധനയിലെ ഞങ്ങളുടെ കള്ളത്തരവും
പൊള്ളത്തരവും പരിശുദ്ധാത്മാവിനെ അയച്ച് തകര്ക്കേണമേ...........
ഞങ്ങളെ അര്ത്ഥരഹിതവും
അപ്രസക്തവുമായ അധരവ്യായാമങ്ങളില്നിന്നും, ചര്ച്ചകളില്നിന്നും, തീരുമാനങ്ങളില്നിന്നും
രക്ഷിക്കേണമേ...............
ഞങ്ങളുടെ തീരുമാനസംഘങ്ങള്ക്ക്
വിവേകവും, ദൈവഭയവും, നീതിബോധവും, മനുഷ്യസ്നേഹവും, ദൈവവചനമനനത്തില്നിന്നുളവാകുന്ന
പക്വതയും നല്കേണമേ.........
ഞങ്ങളുടെ വാക്കുകളില്
നിറഞ്ഞുനില്ക്കുന്ന ധാര്ഷ്ട്യവും, അഹങ്കാരവും, അക്രമവും ഇല്ലാതെയാക്കേണമേ...........
ന്യായംവിധിക്കുന്ന,
മറ്റുള്ളവരെ പലകാരണങ്ങളാല് ദേവാലയത്തിന്റെ പരിസരങ്ങളില്നിന്നും അകറ്റിനിര്ത്തുന്ന
പൈശാചികസ്വഭാവത്തില്നിന്നും ഞങ്ങളെ രക്ഷിക്കേണമേ.........
ഞങ്ങളുടെ തിരിച്ചറിവില്ലായ്മയില്നിന്നും
ചെയ്തുപോയ പ്രവൃത്തികള്, വാക്കുകള്, തീരുമാനങ്ങള്, ഇവകള്മൂലം ഈ ദേവാലയത്തെ
ഉപേക്ഷിച്ചുപോയ ജനത്തെ തിരിച്ചു വരുത്തേണമേ.........
ഞങ്ങള്ക്ക് നിരപ്പിന്റെയും
സമാധാനത്തിന്റെയും ബോധത്തെ നല്കേണമേ..........
ഞങ്ങളെ ജീവന്റെ സംരക്ഷകരാക്കുക...........മരണത്തിന്റെ
ക്വട്ടേഷന് സംഘങ്ങളില്നിന്നും അതിന്റെ പ്രലോഭനങ്ങളില്നിന്നും രക്ഷിക്കേണമേ....
സ്വയനീതീകരണത്തില്നിന്നും,
സ്വയപ്രശംസയില്നിന്നും ഞങ്ങളെ വിടുവിക്കേണമേ................
കഴിഞ്ഞകാലത്തിന്റെ
മഹത്വത്തെയും നിലപാടുകളെയും തീരുമാനങ്ങളെയും പുകഴ്ത്തുന്നതില് ഞങ്ങള് സംതൃപ്തി
കണ്ടെത്തുന്നു......അതില് ഞങ്ങള് സായൂജ്യമടയുന്നു..........അതിന്റെ പ്രവാചകരായി
ഞങ്ങള് വേഷം കെട്ടുന്നു...........അതിലൂടെ ഞങ്ങളുടെ സ്വാര്ത്ഥതാല്പര്യങ്ങള് സംരക്ഷിക്കുവാന്
ഞങ്ങള് ശ്രമിക്കുന്നു........ദൈവമേ ഞങ്ങളോട് പൊറുക്കുക....
ചരിത്രത്തില് ഞങ്ങള്ക്ക്മുന്പേ
സഞ്ചരിച്ച പലരിലും വ്യാപരിച്ച ദൈവികതയും മാനവികതയും അതിനെ പ്രോജ്വലിപ്പിച്ച
പരിശുദ്ധാത്മാവിനെയും ഞങ്ങള്ക്ക് ഇന്ന് നല്കേണമേ........
മറ്റാരൊക്കെയോ ജീവനും, “സാധ്യതകളും” ബലികഴിച്ചു പടുത്തുയര്ത്തിയ സംഘങ്ങളെ, കൂട്ടായ്മകളെ
ഞങ്ങളുടെ സാമ്രാജ്യങ്ങളാക്കി അതിന്റെ അധികാരത്തിമിര്പ്പില് ലാഭംകൊയ്യുകയും, അട്ടഹസിക്കുകയും, മറ്റുള്ളവരെ കൊഞ്ഞനം
കുത്തുകയും ചെയ്യുന്ന അദൈവികഭാവത്തില്നിന്നും ഇന്ന് ഞങ്ങളെ രക്ഷിക്കേണമേ.......
ദൈവമേ എന്നില്വന്നു പാര്ക്കുക.......
ദൈവമേ ഞങ്ങളില് വന്നു പാര്ക്കുക..........ഞങ്ങളെ
നവീകരിക്കുക...രൂപാന്തരപ്പെടുത്തുക.......അവിടുത്തെ ആലയമാക്കുക
ദൈവമേ ഞങ്ങളെ അവിടുത്തെ ആലയമാക്കുക........